کے-الیکٹرک کی ملکیت اور انتظامی کنٹرول سے متعلق اہم انکشافات

کے-الیکٹرک کی ملکیت اور انتظامی کنٹرول سے متعلق اہم انکشافات سامنے آئے ہیں۔کمپنی سیکریٹری نے بورڈ ممبر شان اشعری کا مکتوب پاکستان اسٹاک ایکسچینج کو ارسال کر دیا ہے،جس میں کے-الیکٹرک کی ملکیت کے ڈھانچے اور انتظامی کنٹرول کے حوالے سے تفصیلی معلومات فراہم کی گئی ہیں۔مکتوب کے مطابق کے-الیکٹرک کی ملکیت کیس پاور (KESP) کے پاس ہے،اور اس میں شہریار چشتی کی براہِ راست کوئی سرمایہ کاری موجود نہیں۔کیس پاور میں سرمایہ کاری الجمومیہ گروپ، دینہم انوسمنٹ اور ایس پی وی 21 نے کر رکھی ہے۔دستاویز میں بتایا گیا ہے کہ ایس پی وی 21 کے کیس پاور میں ڈائریکٹر کیسی میکڈونلڈ ہیں،اور حصص کی فروخت کا قانونی اختیار صرف انہی کے پاس ہے۔مزید کہا گیا ہے کہ شیئر ہولڈنگ معاہدے کے تحت کمپنی کے انتظامی کنٹرول میں کسی بھی تبدیلی پر پابندی ہے،تاہم شہریار چشتی نے بغیر رضامندی کے کمپنی کا کنٹرول حاصل کرنے کی کوشش کی، جو معاہدے کی خلاف ورزی ہے۔ذرائع کے مطابق الجمومیہ گروپ اور دینہم انوسمنٹ نے شہریار چشتی کے خلاف کیمن آئی لینڈ کی گرینڈ کورٹ میں مقدمہ دائر کر رکھا ہے،جس کی سماعت جاری ہے۔مکتوب میں مزید کہا گیا ہے کہ شہریار چشتی کے پاس KESP میں کسی بھی حصص کی فروخت یا منتقلی کا اختیار نہیں،جبکہ عدالت نے قرار دیا ہے کہ ایس پی وی 21 پر کنٹرول حاصل کرنے کی کوئی بھی کوشش معاہدے کی خلاف ورزی تصور ہوگی۔