کراچی میں موسم مزید سرد ہونے کی توقع، شہر کی فضا آلودہ ترین شہروں میں شامل

محکمہ موسمیات نے شہر قائد میں رات کے اوقات میں سرد ہوائیں چلنے کا امکان ظاہر کرتے ہوئے کہا ہے کہ آئندہ دنوں میں موسم مزید سرد ہوسکتا ہے۔ صبح کے وقت خنکی کے ساتھ ٹھنڈی ہواؤں کا سلسلہ بھی بڑھنے کا امکان ہے۔محکمہ موسمیات کے مطابق فی الحال شہر میں موسم خشک اور خنک ہے جبکہ سمندری ہوائیں بند ہیں۔ آئندہ 24 گھنٹوں کے دوران دن کے وقت موسم گرم اور خشک رہنے کی توقع ہے۔محکمہ موسمیات کے مطابق کم سے کم درجہ حرارت 17 ڈگری سینٹی گریڈ ریکارڈ کیا گیا ہے جبکہ زیادہ سے زیادہ درجہ حرارت 35 سے 38 ڈگری سینٹی گریڈ رہنے کا امکان ہے۔ شہر کی فضا میں نمی کا تناسب 66 فیصد ریکارڈ کیا گیا۔دوسری جانب ایئر کوالٹی انڈیکس رپورٹ کے مطابق کراچی کی فضا انتہائی غیر صحت بخش قرار دی گئی ہے، شہر کی فضائی آلودگی 256 پارٹیکیولیٹ میٹرز ریکارڈ کی گئی، جس کے بعد کراچی دنیا کے آلودہ ترین شہروں میں تیسرے نمبر پر شمار کیا گیا۔