اینٹی وہیکل لفٹنگ سیل (AVLC) اور درخشاں پولیس نے مختلف علاقوں میں کارروائیوں کے دوران مبینہ مقابلوں کے بعد 3 زخمیوں سمیت 7 ملزمان کو گرفتار کرلیا۔ پولیس نے اسلحہ، چوری شدہ گاڑیاں، موٹرسائیکلیں، موبائل فونز، نقد رقم اور گاڑیوں کے لاک توڑنے کی اسپیشل چابیاں بھی برآمد کیں۔ ترجمان ایس ایس پی AVLC امجد احمد شیخ کے مطابق اورنگی ٹاؤن نمبر 11، حوا گوٹھ شراب خانے کے قریب کارروائی میں دو ڈاکو زخمی جبکہ ایک کو گرفتار کیا گیا، جنہیں عباسی شہید اسپتال منتقل کر دیا گیا۔ گرفتار ملزمان کی شناخت انس ولد محمد ندیم (25 سال)، امان اللہ ولد غلام مصطفیٰ (40 سال) اور نادر علی کے نام سے ہوئی۔ پولیس کے مطابق زخمی ملزم امان اللہ 2011 سے جرائم پیشہ سرگرمیوں میں ملوث ہے اور اس کے خلاف دہشت گردی ایکٹ، اسلحہ ایکٹ اور دیگر جرائم کے تحت 11 مقدمات درج ہیں۔ ملزم انس کے خلاف بھی دو مقدمات تھانہ الفلاح اور گلستان جوہر میں درج ہیں۔ تیموریہ تھانے کی حدود میں کی گئی کارروائی کے دوران چوری شدہ ہنڈا سٹی کار (رجسٹریشن نمبر AEK-616) اور دو پستولیں برآمد ہوئیں۔ گرفتار ملزمان کا تعلق جھٹ پٹ، بلوچستان سے ہے اور یہ چوری شدہ گاڑیاں ایک شخص حاجی پاکستانی کو فروخت کرتے تھے۔ پولیس کا کہنا ہے کہ گروہ کے دو اہم کارندے عمران مغیری اور زکریا مغیری تاحال مفرور ہیں، جن کی گرفتاری کے لیے چھاپے مارے جا رہے ہیں۔
اینٹی وہیکل لفٹنگ سیل اور پولیس کی کارروائی، 7 ملزمان گرفتار
