بین الاقوامی اور مقامی مارکیٹوں میں سونے کی قیمت تاریخ کی نئی بلند ترین سطح پر پہنچ گئی

سونے کے نرخوں میں اضافے کا سلسلہ رکنے کا نام نہیں لے رہا۔ بدھ کے روز سونا تاریخ کی نئی بلند ترین سطح پر پہنچ گیا۔بین الاقوامی بلین مارکیٹ میں فی اونس سونے کی قیمت 58 ڈالر کے نمایاں اضافے کے بعد 4 ہزار 198 ڈالر کی نئی ریکارڈ سطح پر پہنچ گئی ہے۔عالمی مارکیٹ کے اثرات کے تحت پاکستانی صرافہ بازاروں میں بھی سونے کی قیمتوں میں نمایاں اضافہ دیکھا گیا۔آج 24 قیراط فی تولہ سونا 5 ہزار 800 روپے مہنگا ہو کر 4 لاکھ 40 ہزار 900 روپے کی ریکارڈ سطح پر پہنچ گیا۔اسی طرح فی 10 گرام سونا 4 ہزار 972 روپے اضافے سے 3 لاکھ 78 ہزار روپے کا ہو گیا ہے۔صرافہ ایسوسی ایشن کے مطابق سونے کی قیمتوں میں مسلسل اضافے کی بنیادی وجہ عالمی معاشی غیر یقینی صورتحال، ڈالر کی قدر میں اتار چڑھاؤ اور سرمایہ کاروں کا قیمتی دھاتوں کی جانب رجحان ہے۔