محکمہ موسمیات کا سمندری طوفان “شکتی” سے متعلق ساتواں الرٹ جاری

محکمہ موسمیات کے سائیکلون وارننگ سینٹر کراچی نے شمال مشرقی بحیرہ عرب میں بننے والے سمندری طوفان “شکتی” کے حوالے سے ساتواں الرٹ جاری کردیا۔محکمہ موسمیات کے مطابق طوفان گزشتہ 12 گھنٹوں میں مزید شدت اختیار کرتے ہوئے مغرب کی سمت بڑھا ہے اور اس وقت کراچی سے تقریباً 390 کلومیٹر جنوب-جنوب مغرب میں موجود ہے۔ 5 اکتوبر تک طوفان شمال مغرب اور وسطی شمالی بحیرہ عرب کی جانب بڑھنے کے بعد بتدریج کمزور پڑنے کا امکان ہے۔الرٹ کے مطابق طوفان کے زیر اثر آج کراچی، بدین، ٹھٹھہ، سجاول، جامشورو، حب، لسبیلہ، آواران اور کیچ میں چند مقامات پر آندھی اور گرج چمک کے ساتھ ہلکی سے درمیانی بارش کا امکان ہے۔محکمہ موسمیات نے خبردار کیا ہے کہ سندھ کے ساحل کے قریب 55 کلومیٹر فی گھنٹہ کی رفتار سے تیز ہوائیں چل سکتی ہیں جبکہ سمندری لہریں بھی غیر معمولی اونچی ہونے کی توقع ہے۔ 4 اکتوبر کی شام تک طوفان کے مرکز میں ہواؤں کی رفتار 110 سے 125 کلومیٹر فی گھنٹہ تک بڑھ سکتی ہے۔ماہی گیروں کو 7 اکتوبر تک گہرے سمندر میں نہ جانے کی ہدایت دی گئی ہے۔ سائیکلون وارننگ سینٹر کراچی صورتحال پر مسلسل نظر رکھے ہوئے ہے۔