صوبہ سندھ میں تیل اور گیس کے نئے ذخائر دریافت، توانائی کے شعبے میں اہم پیش رفت

آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے صوبہ سندھ کے ضلع خیرپور میں بترسِم ایسٹ-1 کنویں سے تیل اور گیس کے بڑے ذخائر دریافت کرنے کا اعلان کیا ہے۔ترجمان او جی ڈی سی ایل کے مطابق اس کنویں سے یومیہ 2 کروڑ 25 لاکھ مکعب فٹ گیس اور 690 بیرل خام تیل حاصل ہوگا۔ کمپنی نے یہ بھی بتایا کہ بترسِم ایسٹ-1 کنویں کی کھدائی 30 جون 2025 کو شروع کی گئی تھی اور اسے 3800 میٹر گہرائی تک کھودا گیا۔ترجمان کا کہنا ہے کہ اس نئی دریافت سے نہ صرف ملک کے توانائی کے ذخائر میں اضافہ ہوگا بلکہ مقامی وسائل سے توانائی کی بڑھتی ہوئی طلب کو پورا کرنے میں بھی مدد ملے گی۔ اس کے ساتھ ساتھ، تیل اور گیس کی درآمدات پر انحصار کم ہونے سے ملکی امپورٹ بل میں بھی واضح کمی آئے گی۔