پاکستان اور سعودی عرب کے مابین اسٹریٹجک دفاعی معاہدہ، ملک بھر میں جشن کا سماں

پاکستان اور سعودی عرب کے درمیان تاریخی نوعیت کے اسٹریٹجک باہمی دفاعی معاہدے (SMDA) پر دستخط کے بعد ملک بھر میں خوشی اور جشن کا ماحول دیکھنے میں آیا۔ اس موقع پر کراچی میں مزارِ قائد اور سول ایوی ایشن اتھارٹی ہیڈکوارٹر کو سبز روشنیوں سے سجایا گیا، جبکہ دونوں عمارتوں پر پاکستان کے پرچم کے ساتھ سعودی عرب کا قومی پرچم بھی لہرایا گیا۔سول ایوی ایشن اتھارٹی کے ترجمان کے مطابق یہ اقدام دونوں برادر ممالک کے دیرینہ تعلقات کی مضبوطی اور باہمی اعتماد کے بڑھتے ہوئے رشتے کی عکاسی کرتا ہے۔ اس معاہدے کو نہ صرف دفاعی تعاون کی نئی وسعت قرار دیا جا رہا ہے بلکہ اسے خطے میں امن اور استحکام کے لیے ایک اہم سنگِ میل بھی سمجھا جا رہا ہے۔واضح رہے کہ یہ معاہدہ گزشتہ روز سعودی ولی عہد محمد بن سلمان اور وزیرِاعظم پاکستان شہباز شریف کے درمیان طے پایا۔ معاہدے کے تحت اگر کسی ایک ملک پر بیرونی حملہ کیا گیا تو اسے دونوں ممالک پر حملہ تصور کیا جائے گا، جس سے دفاعی شراکت داری کو نئی جہت ملنے کے ساتھ ساتھ علاقائی سلامتی کو بھی تقویت ملے گی۔