بوٹ بیسن پولیس کی کارروائی، جعلی میجر بن کر اغواء کی وارداتوں میں ملوث دو ملزمان گرفتار

شہر قائد کے علاقے بوٹ بیسن میں پولیس نے جعلی میجر بن کر شارٹ ٹرم اغواء کی وارداتوں میں ملوث دو ملزمان کو گرفتار کرلیا۔پولیس کے مطابق گرفتار ملزمان کی شناخت طلال افسر عرف میجر ظفر اور امام بخش کے نام سے ہوئی ہے۔ ملزمان کے قبضے سے دو 30 بور پستول، ایک گاڑی، چار وائرلیس سیٹ، چار موبائل فون اور تین بلٹ پروف جیکٹس برآمد کی گئی ہیں۔ابتدائی تفتیش میں ملزمان نے متعدد وارداتوں کا اعتراف کیا ہے۔ پولیس کا کہنا ہے کہ ملزمان نے مدعی تاج الدین سے دو اقساط میں 80 لاکھ روپے تاوان وصول کرنے کا اعتراف بھی کیا ہے، جس کا مقدمہ تھانہ ٹیپو سلطان میں درج ہے۔ایس ایس پی ساؤتھ کے مطابق ملزمان تھانہ بوٹ بیسن کے مقدمے میں بھی ملوث پائے گئے ہیں، جبکہ مرکزی ملزم طلال افسر عرف میجر ظفر پہلے ہی اشتہاری قرار دیا جاچکا ہے۔ اس کے خلاف تھانہ سپر مارکیٹ اور گلشن اقبال میں بھی مقدمات درج ہیں۔پولیس نے گرفتار ملزمان کے خلاف مزید مقدمات درج کرلیے ہیں اور ان کے دیگر ساتھیوں کی گرفتاری کے لیے چھاپے مارے جارہے ہیں۔ حکام کا کہنا ہے کہ ملزمان ایک پیشہ ور جرائم پیشہ گروہ کا حصہ ہیں اور تفتیش میں مزید اہم انکشافات متوقع ہیں۔