ایف آئی اے کراچی کی غیر قانونی حوالہ ہنڈی کے خلاف کارروائی، دو ملزمان گرفتار

ایف آئی اے کراچی زون نے غیر قانونی حوالہ ہنڈی اور کرنسی ایکسچینج کے خلاف بڑی کارروائی کرتے ہوئے دو اہم ملزمان کو گرفتار کرلیا۔ترجمان ایف آئی اے کے مطابق یہ کارروائی ڈائریکٹر جنرل ایف آئی اے کی ہدایت پر اینٹی کرپشن سرکل کراچی نے انجام دی۔ گرفتار ملزمان کی شناخت عبدالواسع اور دانیال خضر کے ناموں سے ہوئی، جنہیں شاہراہِ فیصل اور ٹیپو سلطان روڈ سے حراست میں لیا گیا۔کارروائی کے دوران ایک کروڑ روپے نقدی، موبائل فونز اور دیگر شواہد برآمد ہوئے ہیں۔ ایف آئی اے کے مطابق ملزمان غیر قانونی طریقے سے ملکی و غیر ملکی کرنسی کی منتقلی اور حوالہ ہنڈی کے ذریعے رقم بیرونِ ملک بھیجنے میں ملوث تھے۔ترجمان نے مزید بتایا کہ برآمد شدہ رقم کے حوالے سے ملزمان کوئی تسلی بخش وضاحت پیش نہ کرسکے، جس پر ان کے خلاف مقدمہ درج کرکے تفتیش شروع کر دی گئی ہے جبکہ دیگر ساتھیوں کی گرفتاری کے لیے چھاپے بھی جاری ہیں۔