میئر کراچی کا پی آئی ڈی سی ایل سے گرین لائن اور ریڈ لائن منصوبوں کی تکمیل کی حتمی تاریخ کا مطالبہ

میئر کراچی بیرسٹر مرتضیٰ وہاب نے گرین لائن اور ریڈ لائن منصوبوں میں طویل تاخیر پر شدید تنقید کرتے ہوئے خدشہ ظاہر کیا ہے کہ اگر موجودہ صورتحال برقرار رہی تو یہ منصوبے 2035 تک بھی مکمل نہیں ہو سکیں گے۔اپنے ایک بیان میں میئر کراچی نے پی آئی ڈی سی ایل سے مطالبہ کیا کہ گرین لائن اور ریڈ لائن منصوبوں کی تکمیل کی حتمی تاریخ دی جائے تاکہ شہریوں کو آگاہی مل سکے۔ انہوں نے کہا کہ منصوبوں کے باعث سڑکوں کی مرمت، فٹ پاتھوں کی خرابی اور دیگر مسائل نے کراچی کے شہریوں کی مشکلات میں اضافہ کر دیا ہے۔مرتضیٰ وہاب کا کہنا تھا کہ 2017 میں دیے گئے این او سی کے باوجود منصوبہ اب تک مکمل نہیں ہوا، جس سے ظاہر ہوتا ہے کہ شہری مسائل حل کرنے میں مقامی قیادت کو شامل نہیں کیا گیا۔انہوں نے کہا کہ ماضی میں گرین لائن پر ناگن چورنگی اور کے ڈی اے چورنگی پر رکاوٹوں کی وجہ سے مشکلات کا سامنا رہا، جبکہ اس وقت یونیورسٹی روڈ پر ریڈ لائن منصوبے کے باعث شہری بدترین مسائل سے دوچار ہیں۔میئر کراچی نے زور دیا کہ منصوبوں کی بروقت تکمیل کے لیے مقامی حکومت کو اعتماد میں لیا جائے تاکہ شہر کی صورتحال مزید خراب نہ ہو۔