سندھ میں مون سون بارشوں کی پیشگوئی،کراچی میں بھی بارش کا امکان

محکمہ موسمیات کے مطابق مون سون ہوائیں سندھ کے مختلف علاقوں میں داخل ہو رہی ہیں، جس کے نتیجے میں آج سے بارشوں کا نیا سلسلہ شروع ہونے کا امکان ہے۔ محکمہ موسمیات کا کہنا ہے کہ آج (بدھ) دادو اور قمبر شہداد کوٹ میں گرج چمک کے ساتھ بارش متوقع ہے، جب کہ کل سے تھرپارکر، عمرکوٹ، میرپورخاص، ٹھٹھہ، سجاول اور بدین کے مختلف علاقوں میں بھی بارش کا امکان ہے۔ اسی سلسلے میں 19 جولائی کو میرپورخاص، حیدرآباد، سانگھڑ، ٹنڈو محمد خان اور دوبارہ سجاول میں بارش کی پیشگوئی کی گئی ہے۔ محکمہ موسمیات نے کراچی میں بھی 19 جولائی کو گرج چمک کے ساتھ بارش کی اطلاع دی ہے، جس سے شہریوں کو ممکنہ اربن فلڈنگ اور ٹریفک مسائل کا سامنا ہو سکتا ہے۔ شہریوں کو مشورہ دیا گیا ہے کہ وہ موسم کی صورتحال سے باخبر رہیں اور غیر ضروری سفر سے گریز کریں۔