نادرا کی بڑے پیمانے پر بھرتیوں کا فیصلہ، سندھ کے مختلف اضلاع میں دفاتر قائم کیے جائیں گے

نیشنل ڈیٹا بیس اینڈ رجسٹریشن اتھارٹی (نادرا) نے بڑے پیمانے پر بھرتیوں اور نئے دفاتر کے قیام کا فیصلہ کر لیا ہے۔ اس سلسلے میں ادارہ مختلف اضلاع میں پلاٹس خریدے گا جہاں نئے بھرتی ملازمین کے لیے دفاتر قائم کیے جائیں گے۔تفصیلات کے مطابق نادرا کراچی کے پانچ اضلاع اور اندرونِ سندھ کے 9 اضلاع میں 200 جونیئر ایگزیکٹیو (ڈیٹا انٹری آپریٹرز) بھرتی کرے گی۔نادرا کے مطابق بھرتیوں کے لیے امیدواروں کی تعلیمی قابلیت انٹرمیڈیٹ رکھی گئی ہے جبکہ عمر کی بالائی حد 25 سال مقرر کی گئی ہے۔
ان بھرتیوں کے لیے واک اِن انٹرویوز 3 نومبر سے شروع ہوں گے۔نادرا سندھ کے 11 دیگر اضلاع میں بھی پلاٹس خریدے گی جن میں میرپور خاص، میرپور ساکرو، کوٹری، مٹیاری، چھاچھرو، جھڈو، میرپور ٹھورو، ٹنڈو الہیار، جامشورو، ٹھٹہ اور سجاول شامل ہیں۔نادرا حکام کے مطابق نئے دفاتر کے قیام سے عوام کو رجسٹریشن اور ڈیٹا اپڈیٹ کی سہولیات مزید بہتر انداز میں فراہم کی جا سکیں گی۔