خالی کی جانے والی بستیاں سرکار کی ملکیت ہیں اور ان پر کسی کو قبضہ نہیں کرنے دیا جائے گا،شرجیل میمن

سندھ کے سینیئر وزیر شرجیل انعام میمن نے کہا ہے کہ افغان مہاجرین سمیت کسی بھی غیر قانونی تارک وطن کو ملک میں نہیں رہنا چاہیے۔ میڈیا سے گفتگو میں شرجیل میمن نے کہا کہ خالی کی جانے والی بستیاں سرکار کی ملکیت ہیں اور ان پر کسی کو قبضہ نہیں کرنے دیا جائے گا۔انہوں نے کہا کہ سندھ حکومت کے محکمہ ٹرانسپورٹ کا کمانڈ اینڈ کنٹرول سسٹم فعال طور پر کام کر رہا ہے، جہاں تمام آپریشنز کو لائیو مانیٹر کیا جاتا ہے۔ان کے مطابق، روٹس، مسافروں کی مانیٹرنگ، سہولیات، اور بی آر ٹی کی آمدنی پر بھی کڑی نظر رکھی جاتی ہے۔سینیئر وزیر نے کہا کہ خواتین زیادہ سے زیادہ ڈرائیونگ لائسنس بنوائیں، کیونکہ خواتین کو خودمختار بنانے کے لیے سندھ حکومت کے منصوبے جاری ہیں۔انہوں نے بتایا کہ خواتین کے لیے پہلی بس سروس سندھ حکومت نے شروع کی، اور دسمبر میں “پنک ای وی ٹیکسی” بھی متعارف کرائی جائے گی جس سے خواتین کو مزید سہولت ملے گی۔ان کا کہنا تھا کہ بارشوں اور ترقیاتی کاموں کے باعث بس سروسز کو وقتی مشکلات پیش آتی ہیں، تاہم حکومت کی کوشش ہے کہ پورے صوبے میں بہتر پبلک ٹرانسپورٹ سروسز فراہم کی جائیں۔انہوں نے بتایا کہ ٹھیکیداروں سے معاملات طے پا چکے ہیں اور آئندہ سندھ کابینہ اجلاس میں نئی اسکیموں کی منظوری لی جائے گی۔سینیئر وزیر کے مطابق سینیٹر تاج حیدر برج کی تعمیر جاری ہے اور شاہراہ بھٹو بھی کافی حد تک مکمل ہو چکی ہے۔قبل ازیں، شرجیل انعام میمن نے گرین اور اورنج لائن آپریشنز کمانڈ اینڈ کنٹرول سینٹر کا دورہ کیا، جہاں انہیں آپریشنز سے متعلق تفصیلی بریفنگ دی گئی۔