کراچی کےعلا قےموسمیات پر نامعلوم افراد کی جانب سے زبردست ہنگامہ آرائی

 گزشتہ روز اسکیم 33 موسمیات پر نامعلوم افراد کی جانب سے زبردست ہنگامہ آرائی کی گئی تھی، مظاہرین نے پُر تشدد احتجاج کی آڑ میں کئی دکانوں پر لوٹ مار بھی کی۔ اس ہنگامہ آرائی اور لوٹ مار کی سی سی ٹی وی فوٹیجزمیں دیکھا جا سکتا ہے کہ لوٹ مار کرنے والے شہریوں نے نہ موبائل شاپ چھوڑی، نہ اسٹیشنری کی دکان کو بخشا۔موسمیات کے قریب جب ہنگامہ آرائی کرنے والے پہنچے تو صورت حال دیکھ کر دکان کے ملازم کو پریشان دیکھا جا سکتا ہے، دکانوں کے باہر شہریوں اور دکان داروں کو ڈنڈوں سے مارا پیٹا گیا، ایک فوٹیج میں دیکھا جا سکتا ہے کہ برقع پہنے ایک خاتون گود میں بچی کو لے کر بھاگی۔ فوٹیج کے مطابق ایک نوجوان نے لاتیں مار کر دکان میں سامان کو گرایا، ڈھاٹا پہنے ایک شخص آیا اور کاؤنٹر میں ہاتھ ڈال کر پیسے نکال لیے، ملازم نے شلوار قمیص پہنچے شخص کو روکنے کی کوشش بھی کی، تاہم ڈھاٹا بردار شخص نے مٹھی میں پیسے پکڑے اور باہر بھاگ گیا۔ باہر موجود افراد نے توڑ پھوڑ اور پتھراؤ شروع کر دیا، اس ہنگامہ آرائی کے دوران جس کے ہاتھ جو لگا وہ لے کر بھاگا، ڈنڈا بردار افراد کی جانب سے کئی دکانیں بھی بند کروائی گئی۔ مظاہرین نے قوم پرست جماعت کے جھنڈے اٹھا رکھے تھے، اور انھوں نے راہگیروں پر تشدد بھی کیا۔