سمندری طوفان کی شدت میں کمی، گہرے دباؤ میں تبدیل

بحیرہ عرب میں موجود سمندری طوفان مزید کمزور ہو کر گہرے دباؤ (ڈیپ ڈپریشن) میں تبدیل ہوگیا ہے، جو اس وقت کراچی سے تقریباً 960 کلومیٹر جنوب مغرب میں موجود ہے۔محکمہ موسمیات کے مطابق یہ گہرا دباؤ بحیرہ عرب کے مغربی وسطی اور شمال مغربی حصوں میں جنوب یا جنوب مشرق کی سمت بڑھ رہا ہے، جس کے اگلے 6 گھنٹوں کے دوران ڈپریشن میں اور 12 گھنٹوں میں کم دباؤ والے علاقے میں تبدیل ہونے کا امکان ہے۔محکمہ موسمیات نے بتایا کہ اگلے 12 گھنٹوں تک سمندر کی صورتحال اونچی لہروں اور تیز ہوا کے باعث انتہائی خراب رہنے کا امکان ہے، جبکہ طوفان کے مرکز کے قریب ہوا کی رفتار 70 کلومیٹر فی گھنٹہ تک پہنچ سکتی ہے۔اس صورتحال کے پیشِ نظر ماہی گیروں کو ہدایت کی گئی ہے کہ وہ آج تک گہرے سمندر میں جانے سے گریز کریں۔سائیکلون وارننگ سینٹر کراچی کی جانب سے سسٹم کی مسلسل نگرانی جاری ہے۔