شہر قائد میں ٹریفک حادثے میں مسافر مزدا اور واٹر ٹینکر کی ٹکر سے خاتون سمیت دو افراد جاں بحق ہوگئے۔ ایکسپریس کے مطابق اورنگی ٹاؤن تھانے کے علاقے اورنگی ٹاؤن پانچ نمبر کے قریب ٹریفک حادثے میں خاتون جاں بحق ہوگئی جس کی لاش ایدھی ایمبولینس کے ذریعے جناح اسپتال منتقل کی گئی جہاں متوفیہ خاتون کی شناخت 45 سالہ امبرین کے نام سے کی گئی۔ ایس ایچ او آغا اسلم کے مطابق متوفیہ خاتون اورنگی ٹاؤن کی رہائشی تھی اور اپنے شوہر کے ساتھ موٹر سائیکل پر جا رہی تھی کہ تیز رفتار مسافر مزدا نے موٹر سائیکل کو ٹکر ماردی جس کے باعث موٹر سائیکل سوار خاتون جاں بحق ہوگئی جب کہ شوہر مجعزانہ طور پر محفوظ رہا۔ پولیس نے فوری کارروائی کرتے ہوئے مسافرمزدا کے ڈرائیور اسلم کو گرفتار کرکے مسافر مزدا کو قبضے میں لے کر تھانے منتقل کردیا۔
ڈیفنس تھانے کے علاقے ڈیفنس موڑ کے قریب ٹریفک حادثے میں موٹر سائیکل سوار شخص جاں بحق ہوگیا جس کی لاش قانونی کارروائی کے لیے چھیپا ایمبولینس کے ذریعے جناح اسپتال منتقل کی گئی جہاں متوفی کی شناخت 55سالہ صابر حسین کے نام سے کی گئی۔ ایس ایچ او ڈیفنس اسرار حسین نے بتایا کہ متوفی شخص موٹر سائیکل پر سوار تھا جو متوفی واٹر ٹینکر کی ٹکر سے جاں بحق ہوا، حادثے کے بعد واٹر ٹینکر موقع سے فرار ہوگیا۔ ایس ایچ او نے بتایا کہ پولیس حادثے کی سی سی ٹی وی فوٹیج حاصل کرنے کی کوشش کررہی ہے تاکہ یہ معلوم ہوسکے کہ واٹر ٹینکر نے موٹر سائیکل کو ٹکر ماری یا موٹر سائیکل سوار خود واٹر ٹینکر سے ٹکرایا، پولیس واقعے کی تفتیش کر رہی ہے۔
